遠聲彈閘花絮16/7/2009

周四兩組彈閘，在炎熱天氣下舉行，誰人最勤力？，阿拉為大家點下名，有冼文諾、杜西奧、高君濤、何華麟、李健銘、徐錦輝及謝偉豪七子，全部皆屬近期有成績之輩，反映甚麼，心照不宣了。

試閘過程順利，第一組七駒列陣。就哥仔佔其二，未命名〝Ａ90〞用徐錦輝，走來出腳純熟，形格亦靚仔，留意可也，同馬房〝紫電風雷〞評分較前駒低，狀態則在伯仲之間，仍待琢磨，但得杜西奧垂青，將來成就應會不俗，此廄彈閘跑出之名次，完全不重要。

此組最高分者為〝百事盈〞，七戰七捷明星馬，走來點地無聲，沙草皆宜，已成為馬迷及阿拉之新偶像。〝鬥志梟雄〞由頭放到尾，跑第一而回，具速度之馬，真正比賽當然贏不到前駒。

第二組出馬六匹，譚文就一樣佔兩駒，先睇杜西奧策騎之“英勇龍駒”，質新馬仍稚嫩，力度尚未足，狀態只是一般，但此對騎練組合異常合拍。新倉主潘富達武器陸續登場，“Ａ76〞用高君濤，走勢含蓄，有意掩住鋒芒，新馬房會較急進，千祈要吼住佢，話唔定係先頭部隊。

高分馬〝多歡笑〞唔同班，領導群雄合理，近期已準備就緒。黎榮聚〝Ａ69〞有前無後，不知是否怕熱，迅即墮後競跑意慾低，好彩沒有中暑。星哥馬房〝喜勁騰飛〞越操越勇，今試出閘敏捷，有火有力，呢件騰飛系最新武器，務必釘緊。